Imanifesto kanye neNchubomgomo yeLuhlakamsebenti lwe-FF Plus isebenta njengeluhlelo lwekwakha lwekusombulula tinkinga leticindzetela taseNingizimu Afrika leticindzetela kakhulu kanye nekubuyisela tintfo esimeni lesifanele. Loku lokulandzelako kungumgogodla waloluhlelo lwekwakha:

• Kukhutsata luhlelo lwemakethe yamahhala kanye nekufinyelela ematfuba ngalokulinganako.
• Kusungula hulumende lomncane, sikhungo sahulumende lesisheshako losemkhatsini logcambukela kancene etimphilweni tetakhamuti.
• Kukhutsata umbuso lapho wonkhe umuntfu uyalingana ngembi kwemtsetfo futsi acedze tonkhe tinhlobo tenkhohlakalo.
• Kucedza lubandlululo lolumiselwe eLuhlelweni Lwasenta Ngakhona kanye Nekuhlomisa Labamnyama Ngetemnotfo; kusebentisa timo tetenhlalo netemnotfo njengemibandzela yekuhlomisa nekukhutsata ematfuba lalinganako abo bonkhe.
• Kucaphela lilungelo lemtsetsetfosisekelo lelihlonishwa emhlabeni wonkhe lemimango lekutibusa.
• Kusungula imikhandlu yemmango.
• Kwenta tifundza titimele kakhulu.
• Kusungula luhlelo loluncane lwahulumende wasekhaya lolugcile kakhulu ekusebenteni ekhaya.
• Kusungula luphiko lolukhetsekile lwekuphenya tento letisolekako letingekho emtsetfweni tetikhulu tabopmasipala – lokufaka ekhatsi kunyatselwa kwemtsetfo wetemvelo.
• Kunciphisa lusebentisomali lwembuso; kwenta emabhizinisi ahulumende kutsi abe ngulatimele; kwandzisa imalingena yembuso ngekukhutsata kukhula; kuniketa kuhhamuleka kutemtselo; kanye nekusungula ikhomishani yetetimali.
• Kuvikela emalungelo endzawo yalabatimele.
• Kutjala imali ekutfutfukiseni nasekulondvoloteni igridi yekudluliswa kwagezi; kubukana nekwebiwa kwagezi kanye nesakhiwonchanti sagezi lesivikelekile; kukhutsata kuntjintjela emitfonjeni yemandla agezi lovusetelekako, njengemaphaneli elilanga; kuphotfula kuhlukaniswa kwe-Eskom ibe tinhlaka letehlukene; kunciphisa bulukhuni lobuphatselene nemalayisense ekuphehlwa kwagezi ngalokutimele; kanye nekwakha simo lesikahle sekulawula kuphehlwa kwakagezi lesitimele kanye nekuncintisana kulomkhakha.
• Kuchibela umtsetfo lovimbela basebenti kute kutsi kukhutsatwe kwakhiwa kwematfuba emisebenti kube futsi kusagcinwa tinchubo tebasebenti letinebulungiswa; kwakha simo lesikahle sekutsi umkhakha lotimele wakhe ematfuba emisebenti lamanengi; kucedza umkhuba lomubi wekutsi hulumende avule ematfuba emisebenti.
• Kugcina lizinga leliphakeme letemfundvo lapho khona kufundziswa kwelulwimi lwamake/lwelibele/lwasekhaya kuyafinyelelwa nguwonkhe umuntfu kute kufike ezingeni leliphakeme kakhulu, futsi kuchutjwa batali bakanye nemmango.
• Kutfutfukisa iminotfo yendzawo letimele futsi kusungulwe neTindzawo Temnotfo Letikhetsekile letisebentako.
• Kufezekisa kuvikeleka kwematharifu, lucwaningo, kusita etinhlekeleleni kanye nekwakha sakhiwonchanti kute kutsi kuzuze balimi labasakhasa nalabatsengisako.
• Kwakha luhlaka lwenchubomgomo loluhambisana nemvelo futsi loluphocelela umtsetfo wetemvelo ngendlela lefanele kute kutsi kwakhiwe timo letivumako temisebenti yetekulima, temahlatsi kanye nemisebenti yekudweba tinhlanti.
• Kwabela badwebi netinhlanti tindzawo tekudweba temmango letincane ngekhatsi nasemaphetselweni elugu, kube kuvikelwa tinkampani letisembili kanye nekucashatwa.
• Lelive kufanele kutsi lisuke emikhicitweni, emikhubeni kanye nasemitfonjeni yemandla agezi lolimata imvelo; liyekele kungcolisa kepha likhutsate kugaywa kabusha kwalokungasasebenti kwentiwe umkhicito lomusha; kubeka embili emandla agezi lavusetelekako; kuniketa bantfu nemabhizinisi latsite tephulelo temtselo kute kutsi basebentise leminye imitfombo yemandla agezi.
• Kufezekisa tinyatselo tekuvimbela kudaleka kwelugwadvule kanye nekukhutsata kuvusetelwa kwenhlabatsi lapho sekucale kwenteka lugwadvule khona.
• Kulungisa ludzaba lwekwehluleka kwetinchubo tetebulungiswa betebugebengu kute kutsi kucedvwe lubhubhane lwebudlova lobucondziswe kubantfu bebulili lobutsite kanye nekudlwengula.
• Buyisela umtsetfo nelutinto esimeni lesifanele ngekutsi kusungulwe timphiko (emayunithi) temacala ebudlova, ekushushunjiswa kwebantfwana nebantfu, bugebengu lobuhleliwe, budlova bemacembu etigelekece, kushushunjiswa kwetidzakamiva kanye nekubulawa kwebalimi.
• Kuniketa kunakekelwa ngekwetemphilo lokusezingeni lelifanele ngekubeka embili bucwepheshe kunekubeka ingucuko; kucedza kulawulwa ngalokwecile kwetinhlelo telusito lwetempilo; kutfutfukisa sakhiwonchanti setekunakekelwa ngetemphilo semmango; kusungula kubambisana emkhatsini wemikhakha yetekunakekelwa ngekwetemphilo kwahulumende kanye naletimele; kucitsa Umtsetfosivivinyo we-NHI.
• Kukhutsata emalungelo elulwimi kanye nebulwiminyenti.
• kwakha budlelwano nalamanye emave ngekuhloniphana kanye nekubeka embili emave lapho khona iNingizimu Afrika seyivele inabo noma kungasungula budlelwano betekuhwebelana lobucinile.
• Kucinisekisa kulawulwa kweminyele lokusebentako lokubuyisela bucotfo beminyele yelive letfu esimeni lesifanele kanye nalokucedza kuhanjiswa kwempahla lengekho emtsetfweni, njengetibhamu netidzakamiva, kweca iminyele yetfu kanye nekungena kwebantfu kulamanye emave ngalokungekho emtsetfweni.