Die VF Plus het vandag sy kommentaar ingedien teen die voorgestelde gesondheidsregulasies en gevra dat die regulasies in geheel onttrek moet word.
Die voorgestelde wysigings is gepubliseer in Staatskoerant nommer 46048 van 15 Maart 2022.
Die VF Plus het ook verlede week in ‘n vergadering met die minister van gesondheid, Joe Phaahla, gevra vir die wegdoening van die regulasies.
Kommentaar van die publiek en ander belanghebbendes is ‘n duidelike boodskap dat daar wye teenstand teen die regulasies bestaan.
Die VF Plus is van mening dat die wysigings niks anders is as ‘n verskuiwing van politieke mag vanaf die een minister na ‘n ander nie.
Die ANC wil op hierdie wyse sy magsmisbruik van die ramptoestand voortsit nadat president Cyril Ramaphosa dit ná 750 dae op 4 April (vandeesmaand) opgehef het.
Die voorgestelde regulasies se doel is bloot om die regulasies van die Covid-19-ramptoestand te vervang.
Die VF Plus voorsien dat beswaar teen die regulasies in die komende week sterk sal uitkring nadat die sperdatum vir openbare deelname reeds op 14 April verleng is.
Die proses is reeds omstrede nadat e-pos met die reaksies van die publieke en belanghebbendes uitgewis is. Dit het aanleiding gegee tot dreigende regsaksies vanuit verskeie oorde.
Die departement van gesondheid verkeer reeds in ‘n finansiële penarie weens korrupsie, wanadministrasie, wanbestuur en groot regskostes weens mediese nalatigheid en kan daarom nie verdere hofsake bekostig nie.
Dit is belangrik om ‘n verenigde front te vorm teen hierdie jongste poging tot magsmisbruik van die ANC-regering en om saam toe te sien dat die voorgestelde regulasies in die kiem gesmoor word.
;
