Die Dawid Kruiper-plaaslike munisipaliteit (Upington, Mier, Rietfontein, Louisvale), het weereens tydens beurtkrag min of geen drinkwater nie.
Die VF Plus het om hierdie rede gister, 15 Februarie, 'n klag my die menseregtekommissie (MRK) teen Eskom ingedien.
In die klag word versoek dat alle watervoorsieningsaanlegte in die Dawid Kruiper-munisipale gebied permanent van beurtkrag vrygestel word.
Gedurende Desember 2022 het Eskom tydelike vrywaring van beurtkrag aan Dawid Kruiper se waterwerke verleen. Hierdie vrywaring is op 31 Januarie 2023 opgeskort.
Eskom het gister aangedui dat hy bereid is om vir die volgende twee weke die waterwerke vry te stel van beurtkrag. Dié verligting is nog steeds net tydelik.
Tydens beurtkrag stop watervoorsiening na die hoogliggende gebiede in Upington byna onmiddellik.
Ander gemeenskappe soos Mier, Rietfontein en Louisvale, het soms vir ure of selfs dae nadat beurtkrag beëindig is, nie water nie.
Die enigste manier om aan daardie gemeenskappe water te lewer, is deur middel van watertrokke wat die munisipaliteit voorsien.
Daar is nie genoeg tyd tussen beurtkragure vir die watervoorsieningsnetwerk om reservoirs tot op kapasiteit te vul nie.
Gemeenskappe wat sover as 250km buite Upington geleë is en van dieselfde bron afhanklik is, trek die swaarste.
Upington en omstreke is in 'n baie warm deel van Suid-Afrika geleë. Om gemeenskappe sonder water te laat is wreed en kan noodlottig wees.
Water is 'n mens se basiese reg. Die VF Plus sal toesien dat dié mense se regte nie verder geskend word nie.
;
