Die politieke onstabiliteit en ANC-faksiegevegte in die Mangaung-metro het direk daartoe bygedra dat inwoners nóg swakker dienslewering sal ontvang.
Talle vullistrokke en watertenkers is deur die nag aan die brand gesteek in ‘n poging om dienslewering te saboteer.
Die ANC in Mangaung het reeds die vloot tot so ‘n mate wanbestuur dat hy van gehuurde voertuie gebruik moet maak. Dié voertuie is nou ook vernietig.
Die verlies aan hierdie voertuie sal die reeds sukkelende vullisverwyderingsdienste verder in die wiele ry.
Inwoners wat reeds geen water het nie weens die voortslepende waterkrisis, sal ook nie hul watervoorraad by watertenks kan kry nie.
‘n Verdere bron tot kommer is die groot hoeveelheid slange wat die laaste maand in Bloemfontein opgemerk is wat dui op ‘n probleem met plaagdiere.
Die opeenhoping van vullissakke sal dus nie net gesondheidsrisiko’s inhou nie, maar sal ook die veiligheid van inwoners bedreig.
Die VF Plus eis dat die kwaaddoeners so gou moontlik vervolg word. Politieke onstabiliteit mag nie oorspoel na onskuldige belastingbetalers nie.
;
