Die VF Plus en ander opposisiepartye het vandag uit ‘n raadsitting van die Sol Plaatje-plaaslike munisipaliteit gestap nadat die ANC die De Beers-stadion onregmatig aan ‘n farmaseutiese maatskappy wou verhuur.
Dié optrede het daartoe gelei dat die ANC nie ‘n kworum kon vorm om die besluit deur die raad te druk nie.
Die VF Plus is gekant teen hierdie besluit omdat die korrekte prosedures nie gevolg is nie.
Daar bestaan ook verwarring of die hele stadion of slegs 'n gedeelte daarvan verhuur gaan word.
Hierdie stadion, wat oor die enigste tartan-atletiekbaan in Sol Plaatje beskik, is ook die enigste sportgronde wat aan die gemeenskap en skole teen 'n minimale huur beskikbaar is.
Baie van die skole wat van die stadion gebruik maak, beskik nie oor die finansies om ten duurste die fasiliteit te huur nie.
Die VF Plus het ook ‘n klag teen die ANC-raadslid, Eucia Matika, by die speaker, Nomazizi Maputle ingedien na sy tydens die vergadering in haar moedertaal gesê het dat daar “na die teenkanting van die boere geluister moet word, want hulle kry altyd wat hulle wil hê.”
Die VF Plus sal nie toelaat dat die ANC onbesonne besluite deurvoer wat tot nadeel van die gemeenskap is nie.
Sol Plaatje verdien beter as die ANC.
;
