Die VF Plus het Donderdag gevra vir ‘n openbare vergadering met inwoners van Bloemfontein, waar die Mangaung-metroraad se uitvoerende burgemeester, Olly Mlamleli, teenwoordig moet wees om die voortslepende waterkrisis in die metro te verduidelik.
Daar is ook versoek dat die metro se munisipale bestuurder, adv. Tankiso Mea en die hoof uitvoerende beampte van Bloemwater, dr. Limakatso Moorosi, die vergadering bywoon.
"Dit is die plig van Mangaung-metroraad en Bloemwater om inwoners in te lig oor die probleem met watervoorsiening aan Bloemfontein waar betalende inwoners weereens gestraf word met wateronderbekings weens swak finansiële bestuur tussen die metro en die waterverskaffer," sê Elizabeth Snyman-van Deventer, VF Plus-raadslid in die Mangaung-metroraad.
"Mlamleli is openlik aanvallend in haar retoriek in raadsvergaderings, veral oor witmense en hoe grond gesteel is."
"Die doel van ‘n munisipaliteit is om dienste aan sy inwoners te verseker en die VF Plus het begrip vir inwoners van Bloemfontein wat hulle munisipale belasting wil weerhou as gevolg van die gebrek aan basiese dienste in die Mangaung-metro.
"Vir inwoners om nie water te hê nie weens ‘n dispuut tussen die metro en Bloemwater, kom neer op swak finansiële bestuur en Mlamleli moet as burgemeester verantwoordelikheid daarvoor neem en die Bloemfonteinse publiek inlig oor haar plan is om die situasie te beredder,"sê Snyman-van Deventer.
Mlamleli is openlik aanvallend in haar retoriek in raadsvergaderings, veral oor witmense en hoe grond gesteel is.
"Oor dienslewering soos water is sy stil en effektiewelik afwesig om politieke leiding te neem."
Snyman-van Deventer sê Mlamleli moet nou minder praat en meer optree in die metro se waterkrisis wat bykans weekliks vererger – nie meer weens ‘n gebrek aan water of swak infrastruktuur nie, maar weens haar en die ANC se swak bestuur in die metro.
"Die burgemeester het nou die geleentheid om te verduidelik waarom Bloemfonteiners, wat ‘n belangrike bron van inkomste vir die metro is, se krane droog is en wat sy daaraan gaan doen," sê Snyman-van Deventer
Die VF sal inwoners van Bloemfontein op hoogte hou van ‘n datum en plek vir ‘n openbare vergadering met Mlamleli sodra sy daartoe ingestem het.
;
