Cosatu se optrede oor staatsloon-kwessies grens aan sedisie

2015-04-24
Adv Anton Alberts

Cosatu het vandag met ‘n staking waaraan elfduisend mense in Pretoria deelgeneem het gewys hy is ernstig met sy dreigement om Suid-Afrika op sy knieë te dwing as daar nie aan sy eis om ‘n 10%-loonverhoging gehoor gegee word nie, sê adv. Anton Alberts, die VF Plus se parlementêre woordvoerder oor ekonomie.

Cosatu dreig om oor ‘n week met ‘n uitgebreide landwye staking te begin wat onder meer skole, hospitale en ander staatsdienste totaal lam sal lê.

Adv. Alberts sê die staat het weens vele redes soos wanbestuur, korrupsie, groot maatskaplike toelaes en buitensporige staatssalaris-uitgawes, nie die nodige fiskale beweegruimte om aan hoë verhogingseise toe te gee nie.

“Terwyl die land sit met groot probleme soos Eskom en ‘n ekonomie het wat juis vanweë arbeidsonrus die kreeftegang gaan, stel Cosatu steeds hierdie buitensporige eise en is hy so aggressief hieroor dat hy bereid is om die land op sy knieë te dwing.

“Hierdie optrede is uiters riskant en grens aan sedisie wat die staat ondermyn in die stabiliteit van land in sy geheel in gevaar stel.

“Hoe slegter dit weens sulke optrede onvermydelik met die ekonomie sal gaan, hoe minder geld sal die staat beskikbaar hê vir toekomstige aanpassings.

“Dit is daarom duidelik dat Cosatu selfsugtig is net na werkers se belange omsien ten koste van die totale ekonomie en alle werklose mense in die land,” sê adv. Alberts.

 

 

Kontaknommers: 082 391 3117 / 083 419 5403