Bewaringslandbou moet help om wêreld se kosmandjie vol te hou

2014-08-07
Dr Pieter Mulder

Terwyl die wêreld worstel om antwoorde te vind oor toekomstige voedselsekerheid, is Suid-Afrika se grootste enkele kort termyn landbouprobleem een van politieke onsekerheid wat geskep word deur regeringsuitsprake en -besluite, sê dr. Pieter Mulder, leier en parlementslid van die VF Plus.

Dr. Mulder het vandag met sy openingsrede by die Wes-Kaapse Bewaringslandbousimposium gesê die rede hiervoor is dat
landboubesluite nie op grond van die feite geneem word nie, maar op grond van propagandistiese mites, politiek geskepte persepsies en eensydige stereotipes.

“As hierdie benadering nie in die toekoms gaan verander nie, gaan die regering ons landbou terugbestuur na die Middeleeue in plaas van die toekoms in,” sê dr. Mulder.

Hy sê bewaringslandbou is veral in Suid-Afrika se geval belangrik aangesien grond en water skaars en uiters kosbaar is met 98% van die land se oppervlak wat as swak grond soos semi-woestyn of woestyn geklassifiseer word.

Net 13% van die land se 122 miljoen hektaar grond word as geskik beskou om gewasse op te kweek.

“Die vraag moet daarom gevra word of die regering werklik weet wat voedselsekerheid behels en wat die toekoms hieroor inhou.

“Globaal dui beramings daarop dat die wêreld se bevolking gaan toeneem vanaf die huidige 6 miljard (in 2010) tot meer as 9 miljard teen 2050. Kosproduksie sal in dié tyd met 50% moet toeneem.

“Indien alternatiewe nie gevind word nie, sal ‘n landbougebied so groot soos Indië gevind moet word om die ekstra kos te produseer. Dit terwyl faktore soos ‘n groeiende bevolking en droogtes reeds sowat 10 miljoen hektaar van die aarde se oppervlak jaarliks opeis.

“Klimaatsverandering gaan na verwagting ook ‘n reuse aandeel hê in die planeet se toekomstige voedselnood. Die groot vraag is dus hoe om meer te produseer met minder.

“Hier is die gonswoorde vir die toekoms weer tegnologie, navorsing, opvoeding en bewaringslandbou. En die regering moet besef dat politieke inmenging nie teen hierdie agtergrond bekostig kan word nie, sê dr. Mulder.

 

Kontaknommers: 083 419 5403 / 082 674 6670